Мұғалімдердің эмоциялық қажуын жасанды интеллект технологиялары және бағалау құралы (BAT) арқылы диагностикалау
DOI:
https://doi.org/10.26577/JPsS202592102Аннотация
Мақалада мұғалімдердің эмоциялық қажуын (ЭҚ) диагностикалау үшін бағалау құралы (BAT) және жасанды интеллект (ЖИ) технологияларын қолдану мәселесі қарастырылады. Кәсіби қызметтегі жоғары жүктемеге байланысты педагогтар жиі эмоционалдық қажуға ұшырайды, бұл әлсіздік, оқшаулану және когнитивтік бұзылулар түрінде көрініс табады.Зерттеу Алматы қаласындағы "Өрлеу" Ұлттық біліктілікті арттыру орталығы базасында 200 мұғалімнің қатысуымен жүргізілді. Қатысушылар жынысы және жас ерекшеліктері бойынша топтастырылды. Сонымен қатар, ЖИ технологиялары, соның ішінде нақты уақыт режимінде ЭҚ деңгейін бақылайтын диагностикалық чат-боттар қолданылды.Зерттеу нәтижелері жас факторының ЭҚ деңгейіне айтарлықтай әсер ететінін көрсетті, бұл әсіресе ер адамдар арасында анық байқалды. Сонымен бірге, үлкен жастағы топтарда әлсіздік деңгейінің жоғары екендігі анықталды. Жас топтар арасындағы айырмашылықтар статистикалық тұрғыдан маңызды болмағанымен, жас ұлғайған сайын мұғалімдерде ЭҚ деңгейінің артуы байқалды.ЖИ қолдану диагностиканың тиімділігін дәлелдеп, деректерді жинау процесін жеңілдетіп және жедел кері байланыс беруге мүмкіндік жасады. ЖИ-мен интеграцияланған әдістер диагностиканы дәлірек және тез жүргізуге жағдай жасап, мұғалімдердің ЭҚ деңгейін мониторингтеуді жеңілдетті.Зерттеудің практикалық маңыздылығы білім беру ұйымдарына мұғалімдердің эмоционалдық қажуын диагностикалау үшін ЖИ әдістерін енгізу бойынша ұсыныстар әзірлеуінде жатыр. Алынған деректер мұғалімдердің психоэмоционалдық жағдайын жақсартуға, олардың кәсіби төзімділігін арттыруға және білім беру процесінің сапасын көтеруге бағытталған ЭҚ алдын алу бағдарламаларын әзірлеуде пайдаланылуы мүмкін. Мұндай бағдарламаларды енгізу педагогтар арасындағы күйзеліс деңгейін төмендетуге және білім беру мекемелерінде қолайлы жұмыс ортасын қалыптастыруға ықпал етеді.
Түйін сөздер: эмоциялық қажу, бағалау құралы (BAT), жасанды интеллект, мұғалімдердің хал-ахуалы, білім психологиясы.
