Жасөспірімдердің өзгеріске тұлғалық даярлығы мен өзекті функционалды жағдайларының психологиялық зерттелуі
DOI:
https://doi.org/10.26577/JPsS202592101Аннотация
Бұл зерттеу жасөспірімдердің өзгерістерге тұлғалық даярлығы мен олардың функционалдық жағдайларының психологиялық аспектілерін зерттеуге бағытталған. Қазіргі заманғы жасөспірімдер көптеген әлеуметтік және психологиялық өзгерістерге тап болады, сондықтан олардың бейімделу қабілеті маңызды рөл атқарады. Зерттеудің негізгі мақсаты – жасөспірімдердің өзгерістерге психологиялық дайындығының және өзекті функционалды жағдайларының ерекшеліктерін зерттеу.
Зерттеудің ғылыми-практикалық маңыздылығы психологиялық қолдау мен кеңес беру барысында жасөспірімдерге тиімді көмек көрсетуге бағытталған бағдарламаларды жасауға мүмкіндік береді. Әсіресе, психокоррекция және стресс басқару әдістерін жетілдіру үшін зерттеу нәтижелері қолданылуы мүмкін.
Зерттеу барысында «Шаршау - Монотония - Зерігу - Стресс», «Өзгерістерге тұлғалық даярлық» әдістемелері қолданылып, жасөспірімдердің психикалық жағдайлары және өзгерістерге тұлғалық даярлықтары бағаланды. Зерттеу нәтижелері жасөспірімдердегі психикалық шаршау мен стресс деңгейінің жоғары екенін көрсетіп, олардың бейімделуіне кері әсер ететінін дәлелдеді. Жасөспірімдердің көпшілігінде құмарлық, тапқырлық, батылдық және бейімделу қасиеттері төмен деңгейде байқалса да, олардың оптимизм деңгейі өте жоғары, ал сенімділік пен екі ұштылыққа толеранттылық көрсеткіштері орташа дәрежеде көрінеді, бұл олардың дамуына бағытталған қосымша қолдау мен ынталандырудың қажеттілігін көрсетеді. Сондай-ақ, зерттеу нәтижелері мектеп психологтары мен педагогтарға оқушылардың эмоционалдық және психологиялық тұрақтылығын дамыту бойынша практикалық ұсыныстар жасауға негіз бола алады.
Бұл зерттеу жасөспірімдердің тұлғалық дамуына, психологиялық тұрақтылығына әсер ететін негізгі факторларды түсінуге ықпал етіп, білім беру процесіндегі психологиялық қолдау бағдарламаларының тиімділігін арттыруға үлес қосады.
Түйін сөздер: тұлғалық даярлық, функционалдық жағдай, стресс, шаршау, психологиялық тұрақтылық.
